பழனி அருள்மிகு தண்டாயுதபாணி சுவாமி திருக்கோயிலில் வருடாந்திர பராமரிப்பு பணிகள் காரணமாக கடந்த ஜூலை 20-ஆம் தேதி முதல் ரோப்கார் சேவை தற்காலிகமாக நிறுத்தப்பட்டு பராமரிப்புப் பணிகள் தொடங்கப்பட்டன.

​ரோப்கார் இயக்கம் தொடர்பான அனைத்து இயந்திரங்களும் NDT பரிசோதனைக்கு உட்படுத்தப்பட்டு, புதிய இயந்திரங்களை கொள்முதல் செய்ய நடவடிக்கை எடுக்கப்பட்டது. அதன்படி, ரோப்கார் இயக்கத்திற்கான சாஃப்ட் பழுது கண்டறியப்பட்டு, சுமார் 3 லட்சம் ரூபாய் மதிப்பிலான புதிய சாஃப்ட் கொல்கத்தாவிலிருந்து கொண்டுவரப்பட்டுள்ளது. அதனை NDT பரிசோதனை செய்யும் பணியும், கியர் பாக்ஸ் பராமரிப்பு பணியும் மேற்கொள்ளப்பட்டு வருகின்றன.

​புதிய சாஃப்ட் பொருத்தப்பட்டு சோதனை ஓட்டம் முடிந்த பிறகு, தயார் நிலையில் உள்ள புதிய பெட்டிகள் பொருத்தும் பணி நடைபெறும்.

​மேலும், ரோப்கார் கீழ்நிலைய பெருந்திட்டப் பணிகளில் புதிய மேற்கூரை, ஃபால் சீலிங் அமைப்பு, பக்கவாட்டு சுவர்களில் கிரானைட் பதித்தல் போன்ற பணிகள் நடைபெற்று வருகின்றன.

​ரோப்கார் இயந்திரங்கள் பராமரிப்பு பணி மற்றும் சிவில் மராமத்து பணிகள் அனைத்தும் வரும் செப்டம்பர் 12-ஆம் தேதிக்குள் நிறைவடைந்து, பக்தர்கள் பயன்பாட்டிற்கு ரோப்கார் இயக்கம் மீண்டும் தொடங்கும் என திருக்கோயில் இணை ஆணையர் செயல் அலுவலர் தெரிவித்துள்ளார்.