திருச்சூர்: கேரள மாநிலம் திருச்சூர் மாவட்டம் கைப்பமங்கலம் அருகே நள்ளிரவில் நடந்த கொடூர சாலை விபத்தில், திண்டுக்கல் PSNA பொறியியல் கல்லூரியைச் சேர்ந்த மாணவர்கள் 8 பேர் பரிதாபமாக உயிரிழந்தனர்.

விபத்தின் விவரங்கள்: இன்று நள்ளிரவு கைப்பமங்கலம் பனம்பிக்குன்னு மையம் அருகே தேசிய நெடுஞ்சாலையில் ஓரமாக நிறுத்தப்பட்டிருந்த சரக்கு லாரி மீது, வேகமாக வந்த கார் எதிர்பாராதவிதமாக பலமாக மோதியது. இந்த விபத்தில் ஈடுபட்ட கார் தமிழ்நாட்டில் பதிவு செய்யப்பட்ட வாகனமாகும்.

மோதிய வேகத்தில் காரின் முன்பகுதி லாரியின் அடியில் சிக்கி முற்றிலும் நசுங்கியது. காரில் பயணித்த 8 பேரும் சம்பவ இடத்திலேயே துடிதுடித்து உயிரிழந்தனர்.

மீட்பு நடவடிக்கை: தகவல் அறிந்து விரைந்து வந்த கைப்பமங்கலம் போலீசாரும் உள்ளூர் பொதுமக்களும் மீட்புப் பணியில் ஈடுபட்டனர். கார் கடுமையாக சேதமடைந்திருந்ததால், இடிபாடுகளுக்குள் சிக்கியிருந்த உடல்களை காரை வெட்டி எடுத்து மீட்புக் குழுவினர் வெளியே எடுத்தனர்.

உயிரிழந்தவர்களின் உடல்கள் உடற்கூறாய்வு மற்றும் பிரேத பரிசோதனைக்காக திருச்சூர் அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டுள்ளன.

அடையாளம் காணப்பட்ட உயிரிழந்தவர்கள்: முதற்கட்ட விசாரணையில் உயிரிழந்தவர்கள் அனைவரும் திண்டுக்கல் PSNA பொறியியல் கல்லூரி மாணவர்கள் எனத் தெரியவந்துள்ளது. அவர்களில் அடையாளம் காணப்பட்டவர்களின் விவரங்கள்:

• விஸ்வா (20) – சேலம்
• சூர்யா (20) – திண்டுக்கல்
• சந்தோஷ் (20) – மதுரை
• பிரசன்னா – மதுரை
• யுவசஞ்சித் (20) – திண்டுக்கல்

மீதமுள்ள மாணவர்களின் விவரங்கள் குறித்து கைப்பமங்கலம் காவல்துறையினர் தொடர்ந்து விசாரணை நடத்தி, அவர்களின் குடும்பத்தினருக்குத் தகவல் தெரிவித்து வருகின்றனர். இச்சம்பவம் கல்லூரி மாணவர்கள் மற்றும் அவர்களின் குடும்பத்தினர் மத்தியில் பெரும் சோகத்தை ஏற்படுத்தியுள்ளது.

மதுரை மாவட்ட செய்தியாளர் சின்னத்தம்பி