நீலகிரி மாவட்டத்தில் பெண்கள் முன்னேற்றப் பாதையில் ஒரு புதிய அத்தியாயம் தொடங்கியுள்ளது. சேரிங்கிராஸ் பகுதியைச் சேர்ந்த கங்கா என்ற இளம் பெண், சுற்றுலா வாகன ஓட்டியாக (Tourist Vehicle Driver) பணியில் சேர்ந்துள்ளார்.

இதன்மூலம், நீலகிரி மாவட்டத்தில் சுற்றுலா பயணிகளுக்கான நான்கு சக்கர வாகனம் ஓட்டும் முதல் பெண்மணி என்ற பெருமை அவருக்கு கிடைத்துள்ளது.

இதுவரை மாவட்டத்தில் பல பெண்கள் ஆட்டோ ஓட்டுநர்களாக பணியாற்றி வந்தாலும், சுற்றுலா வாகன ஓட்டுனராக கங்கா புதிய வழியை திறந்து வைத்துள்ளார்.

இன்று கங்காவை பாராட்டும் நிகழ்ச்சி உதகை நகர காவல் துறை துணை கண்காணிப்பாளர் மற்றும் போக்குவரத்து துணை ஆய்வாளர் முன்னிலையில் நடைபெற்றது.

இருவரும் கங்காவை நேரில் சந்தித்து வாழ்த்தி, சமூகத்தில் பெண்கள் தன்னம்பிக்கையுடன் முன்னேறி வருவது பெருமைக்குரியதாக கூறினர்.

சுற்றுலா மையமாக விளங்கும் நீலகிரி மாவட்டத்தில், ஒரு பெண் சுற்றுலா வாகன ஓட்டியாகப் பணியாற்றுவது பெண்களின் சமூக–தொழில் முன்னேற்றத்திற்கான புதிய அடையாளம் என பொதுமக்களும் பாராட்டுகின்றனர்.

இது குறித்து அப்பகுதி மக்கள் கூறுகையில், “நீலகிரியின் சாலைகள் பெண்களுக்கான புதிய வாய்ப்புகளை உருவாக்கிக் கொண்டிருக்கின்றன. கங்காவின் சாதனை பலருக்கும் ஊக்கமாக இருக்கும்,” என தெரிவித்தனர்.

நீலகிரி மலையின் புதிய மைல்கல் — பெண்களின் தன்னம்பிக்கைச் சக்கரம் கங்கா தொடங்கியது!