பட்டியலின மக்களை இழிவுபடுத்தியதாக குற்றச்சாட்டு; நடவடிக்கை கோரி விடுதலை சிறுத்தைகள் கட்சி நிர்வாகிகள் புகார்

கன்னியாகுமரி மாவட்ட காவல் கண்காணிப்பாளர் அலுவலகத்தில், சமூக வலைதளத்தில் வெளியிடப்பட்டதாக கூறப்படும் வீடியோ ஒன்றை எதிர்த்து விடுதலை சிறுத்தைகள் கட்சியின் மகளிர் விடுதலை இயக்க மாநில செயலாளர் கலைச்செல்வி மனு அளித்துள்ளார்.

அந்த மனுவில், “Rexona Rex (@sonarx_official24)” என்ற இன்ஸ்டாகிராம் கணக்கின் உரிமையாளர், விடுதலை சிறுத்தைகள் கட்சித் தலைவர் முனைவர் தொல். திருமாவளவன் குறித்து அவதூறாக பேசியதுடன், பட்டியலின மக்களையும் அவர்களுக்கு வழங்கப்படும் அரசுச் சலுகைகளையும் இழிவுபடுத்தும் வகையில் கருத்துகள் வெளியிட்டதாக குற்றஞ்சாட்டப்பட்டுள்ளது.

மனுவின் படி, தற்போது வெளிநாட்டில் பணியாற்றி வருவதாகக் கூறப்படும் திருநெல்வேலி மாவட்டம் வடக்கன்குளம் அருகிலுள்ள பெருங்குடியைச் சேர்ந்த ரெக்சோனா என்பவர், தனது இன்ஸ்டாகிராம் பக்கத்தில் வீடியோ பதிவு ஒன்றை வெளியிட்டதாக தெரிவிக்கப்பட்டுள்ளது.

அந்த வீடியோவில், திருமாவளவன் குறித்து சாதி அடிப்படையிலான அரசியல் குற்றச்சாட்டுகள் முன்வைக்கப்பட்டதாகவும், பட்டியலின மக்களை குறிக்கும் வகையில் அவமதிப்பான சொற்கள் பயன்படுத்தப்பட்டதாகவும் மனுதாரர் தெரிவித்துள்ளார். மேலும், அந்த பதிவுகள் சமூகங்களுக்கிடையே பதற்றத்தை ஏற்படுத்தக்கூடியவை என்றும் மனுவில் குறிப்பிடப்பட்டுள்ளது.

இதனையடுத்து, சம்பந்தப்பட்ட நபர் மீது உரிய சட்டப்பிரிவுகளின் கீழ் வழக்குப்பதிவு செய்து நடவடிக்கை எடுக்க வேண்டும் என காவல்துறையிடம் கோரப்பட்டுள்ளது. சமூக வலைதளங்களில் வெளியிடப்படும் கருத்துக்கள் சமூக அமைதியை பாதிக்காத வகையில் இருக்க வேண்டும் என்பதையும் மனுதாரர் வலியுறுத்தியுள்ளார்.

இந்த மனு அளிக்கும் நிகழ்வில், விடுதலை சிறுத்தைகள் கட்சியின் நாகர்கோவில் சட்டமன்றத் தொகுதி மாவட்ட செயலாளர் சௌத்ரி, துணைச் செயலாளர் அம்பேத் வளவன், இளஞ்சிறுத்தை எழுச்சி பாசறை மகளிர் மாவட்ட செயலாளர் நளினி மணி, தெற்கு மண்டல பகுதி செயலாளர் ஸ்ரீகுமார், மகளிர் விடுதலை இயக்க மாவட்ட துணைச் செயலாளர்கள் கலைச்செல்வி மற்றும் சல்பேஸ்வரி, கன்னியாகுமரி சட்டமன்றத் தொகுதி மருத்துவ தொண்டு மைய மாவட்ட அமைப்பாளர் ராஜா சிங், நில உரிமை மீட்பு இயக்க மாநில துணைச் செயலாளர் நாஞ்சில் துரை, ஊடக பொறுப்பாளர் கருப்பு ரெஜி உள்ளிட்டோர் கலந்து கொண்டனர்.

தமிழகத்தில் சமூக வலைதள பதிவுகள் தொடர்பான புகார்கள் அண்மைக் காலங்களில் அதிகரித்து வருகின்றன. குறிப்பாக அரசியல் தலைவர்கள், சாதி மற்றும் சமூக அடையாளங்களை மையமாகக் கொண்ட பதிவுகள் தொடர்பாக காவல்துறை கண்காணிப்பும் சட்ட நடவடிக்கைகளும் தீவிரப்படுத்தப்பட்டுள்ளன.

இந்த விவகாரம் குறித்து காவல்துறை தரப்பில் அதிகாரப்பூர்வ பதில் இதுவரை வெளியாகவில்லை. புகார் மனு தொடர்பாக ஆரம்பகட்ட விசாரணை நடைபெற்று வருவதாக தகவல்கள் தெரிவிக்கின்றன.

தமிழக விடியல் செய்திகளுக்காக கேமராமேன் ஜெனீருடன்
குமரி மாவட்ட நிருபர் பாவலர் ரியாஸ்.