ஆசாரிப்பள்ளம் அரசு மருத்துவக் கல்லூரி மருத்துவமனையில் நேற்று 2-வது நாளாக தொடர்ந்த போராட்டம்; சேவைகள் பாதிப்பு

நாகர்கோவில் ஆசாரிப்பள்ளம் அரசு மருத்துவக் கல்லூரி மருத்துவமனையில் சுமித் கன்சல்டன்சி நிறுவனத்தின் கீழ் பணியாற்றும் ஒப்பந்தப் பணியாளர்கள் ஊதிய உயர்வு, வார விடுமுறை உள்ளிட்ட கோரிக்கைகளை வலியுறுத்தி நேற்று 2-வது நாளாக போராட்டத்தில் ஈடுபட்டனர். போராட்டம் காரணமாக மருத்துவமனையின் சில அத்தியாவசிய பணிகள் பாதிக்கப்பட்டதாகத் தெரிவிக்கப்படுகிறது.

போராட்டத்தில் ஈடுபட்டுள்ள பணியாளர்கள், தங்களுக்கு வழங்கப்படும் ஊதியம் பிற மாவட்டங்களில் இதேபோன்ற பணிகளில் ஈடுபடும் ஒப்பந்தப் பணியாளர்களுக்கு வழங்கப்படும் ஊதியத்தைவிட குறைவாக இருப்பதாக தெரிவித்துள்ளனர். உரிய ஊதிய உயர்வுடன், வாரந்தோறும் விடுமுறை வழங்க வேண்டும் என்றும் அவர்கள் கோரிக்கை விடுத்துள்ளனர்.

பணியாளர்கள் கூறுகையில், கடந்த ஆண்டு மூன்று மாதங்களுக்கு மட்டும் மாதம் ரூ.18,500 ஊதியம் வழங்கப்பட்டதாகவும், பின்னர் அந்தத் தொகை தவறுதலாக வழங்கப்பட்டதாகக் கூறி மாதந்தோறும் சுமார் ரூ.1,500 வரை ஊதியத்தில் பிடித்தம் செய்யப்பட்டதாகவும் தெரிவித்துள்ளனர்.

இதுகுறித்து நிறுவன நிர்வாகத்திடம் விளக்கம் கேட்டபோது, தற்போதைய ஊதியத்தில் விருப்பம் இருந்தால் தொடர்ந்து பணியாற்றலாம்; இல்லையெனில் வேலையை விட்டு வெளியேறலாம் எனத் தெரிவிக்கப்பட்டதாகவும் பணியாளர்கள் குற்றம்சாட்டுகின்றனர்.

தூய்மைப் பணிக்காக நியமிக்கப்பட்ட தங்களுக்கு, அதற்கு மாறான பணிகளும் வழங்கப்படுவதாகவும், சில பணிகளை மேற்கொள்ளும்போது போதிய பாதுகாப்பு வசதிகள் வழங்கப்படுவதில்லை என்றும் அவர்கள் தெரிவித்துள்ளனர். பணியின் தன்மை மற்றும் பாதுகாப்பு தொடர்பான விதிமுறைகள் முறையாகப் பின்பற்றப்பட வேண்டும் என்றும் கோரியுள்ளனர்.

மேலும், பணிக்கு 5 அல்லது 10 நிமிடங்கள் தாமதமாக வந்ததாகக் கூறி ஒரு நாள் முழுவதற்கான ஊதியம் பிடித்தம் செய்யப்பட்டதாகவும் அவர்கள் குற்றம்சாட்டியுள்ளனர். அதே நாளில் தங்களிடம் முழுமையான பணிகள் பெறப்பட்டதாகவும் தெரிவித்துள்ளனர்.

ஒப்பந்த நிறுவனத்தின் ஊதிய நிர்வாகம், பணிநேரம், விடுமுறை மற்றும் ஊதியப் பிடித்தம் தொடர்பான நடைமுறைகள் குறித்து அதிகாரிகள் உரிய விசாரணை நடத்த வேண்டும் என போராட்டத்தில் ஈடுபட்டுள்ளவர்கள் வலியுறுத்தியுள்ளனர்.

இந்த விவகாரத்தில் மருத்துவமனை நிர்வாகத்தின் செயல்பாடு குறித்தும் சமூக ஆர்வலர்கள் கேள்வி எழுப்பியுள்ளனர். ஒப்பந்த நிறுவனம் மற்றும் மருத்துவமனை நிர்வாகத்துக்கு இடையிலான ஒப்பந்த விதிமுறைகள் முறையாகப் பின்பற்றப்படுகிறதா என்பதையும், பணியாளர்களின் ஊதியத்தில் மேற்கொள்ளப்படும் பிடித்தங்கள் விதிமுறைகளுக்கு உட்பட்டதா என்பதையும் ஆய்வு செய்ய வேண்டும் என அவர்கள் கோரிக்கை விடுத்துள்ளனர்.

மேலும், மருத்துவமனை டீன் உள்ளிட்ட நிர்வாகத்தினர் இந்த விவகாரம் குறித்து அதிகாரப்பூர்வ விளக்கம் அளிக்க வேண்டும் என்றும் சமூக ஆர்வலர்கள் வலியுறுத்தியுள்ளனர். அதேபோல், பணியாளர்கள் முன்வைத்துள்ள குற்றச்சாட்டுகள் குறித்து சுமித் கன்சல்டன்சி நிறுவனத்தின் விளக்கமும் பெறப்பட வேண்டும்.

போராட்டம் காரணமாக நோயாளிகளை ஒரு வார்டிலிருந்து மற்றொரு வார்டுக்கு அழைத்துச் செல்வது, தூய்மைப் பணிகள் உள்ளிட்ட சில சேவைகள் பாதிக்கப்பட்டுள்ளதாகக் கூறப்படுகிறது. நோயாளிகளின் சிகிச்சை பாதிக்கப்படாத வகையில் மாற்று ஏற்பாடுகளை மருத்துவமனை நிர்வாகம் மேற்கொள்ள வேண்டும் என பொதுமக்கள் வலியுறுத்தியுள்ளனர்.

ஊதியம், பணிநேரம், வார விடுமுறை, ஊதியப் பிடித்தம் மற்றும் பணிப் பாதுகாப்பு தொடர்பாக முன்வைக்கப்பட்டுள்ள குற்றச்சாட்டுகள் குறித்து தமிழக அரசு மற்றும் சுகாதாரத் துறை தலையிட்டு, தொழிலாளர் சட்டங்களுக்கு உட்பட்டு முறையான விசாரணை நடத்த வேண்டும் என மக்கள் கோரிக்கை விடுத்துள்ளனர்.

பணியாளர்கள், ஒப்பந்த நிறுவனம் மற்றும் மருத்துவமனை நிர்வாகம் ஆகிய தரப்பினரின் கருத்துகளையும் கேட்டு, ஆவணங்களின் அடிப்படையில் உண்மை நிலையை கண்டறிந்து உரிய தீர்வு காண வேண்டும் என்பதே தற்போது எழுந்துள்ள முக்கிய எதிர்பார்ப்பாக உள்ளது.

தமிழக விடியல் செய்திகளுக்காக கேமராமேன் ஜெனீருடன்
குமரி மாவட்ட நிருபர் பாவலர் ரியாஸ்.