செப் 20 கன்னியாகுமரி

நாகர்கோவில் பயோனியர் குமாரசுவாமி கல்லூரி வணிகவியல் துறை, மாணவர்களின் கல்வியில் தொழில்நுட்பத்தை பயனுள்ள முறையில் ஒருங்கிணைக்க “மொபைல் ஒழுங்குபடுத்தப்பட்ட வகுப்பறை” (Mobile-Regulated Classroom) என்ற புதுமை முயற்சியை அறிமுகப்படுத்தியுள்ளது.

இன்றைய மாணவர்களின் வாழ்வில் மொபைல் போன் பிரிக்க முடியாத ஓர் அங்கமாகி விட்டது. கற்றலுக்கான வாய்ப்புகளுடன், அதன் அதிகப்படியான பயன்பாடு, அடிமைத்தனம் மற்றும் தவறான பயன்பாடு போன்ற சவால்களையும் மாணவர்கள் எதிர்கொள்கின்றனர். இதனைக் கருத்தில் கொண்டு, மாணவர்கள் வகுப்பறைக்கு வந்தவுடன் தங்களது மொபைல் போன்களை சிறப்பு அலமாரியில் வைப்பதும், பாடம் தொடர்பான கலப்பு கற்றல் (Blended Learning) அல்லது டிஜிட்டல் செயற்பாடுகள் நடைபெறும் போது மட்டுமே பயன்படுத்துவதும் இத்திட்டத்தின் முக்கிய அம்சமாகும்.

வணிகவியல் துறைத் தலைவர் முனைவர் சுபத்ரா செல்லத்துரை அவர்கள் பேசியபோது,
“இன்றைய கல்வியில் தொழில்நுட்பம் அவசியம். ஆனால் அதே நேரத்தில் மாணவர்கள் அதைப் பயன்படுத்தும் முறையிலும் ஒழுக்கம் தேவை. இந்த முயற்சி மூலம் மாணவர்கள் டிஜிட்டல் கற்றல் திறன்களை வளர்ப்பதோடு, தவறான பயன்பாட்டிலிருந்து விலகியும், கற்றலின் மீது கவனம் செலுத்தவும் முடியும். இது ஒவ்வொரு வகுப்பறையிலும் நடைமுறைக்கு வர வேண்டிய ஒரு தேவையான திட்டம்,” என்றார்.

புதிய முயற்சியை கல்லூரி துணை முதல்வர் ரெக்சின் தஸ்நவிஸ் அவர்கள் திறந்து வைத்தார். அவர் உரையாற்றும்போது, “மாணவர்கள் தொழில்நுட்பத்தை கற்றலின் துணைவனாகப் பயன்படுத்த வேண்டும்; அதனைத் திசைதிருப்பும் சாதனமாக அல்ல,” என்று வலியுறுத்தினார்.

மாணவர்களிடையே பெரும் வரவேற்பைப் பெற்ற இந்த முயற்சி, “டிஜிட்டல் கல்வி மற்றும் ஒழுக்கம்” ஒன்றிணைந்த வகுப்பறை சூழலை உருவாக்கும் முன்னோடி நடவடிக்கையாக திகழ்கிறது.

குமரி மாவட்ட செய்தியாளர் பாவலர் ரியாஸ்.